年尾將至，聖誕腳步愈來愈近，佳節當前當然要普天同慶。眼見周圍紛紛佈置好燈飾，大人細路都想開開心心過節，為一年畫上完美句號，而講到將歡樂帶給身邊人，又點少得大熱綜藝節目《娛樂3兄弟》的三位Wanna Bros：區永權( Albert )、衛志豪( Michael )，以及陸浩明(六號)！今次一於帶大家與三位型男在酒店行政總廚特別炮製的傳統節日特色美食及運用北歐風食材大玩「Mix and match」的美饌佳餚前邊食邊傾，提早過聖誕之外，更承接他們的節目傳統，讓三位在席間大爆對方趣聞軼事。

歡度佳節　各有大計

聖誕節有人鍾意去個長旅行、有人鍾意約三五知己去食Buffet，但以上通通不是「金牛座Family Man」Albert的選擇。「今年聖誕我身負重任，要拍著細仔一齊演出學校話劇，我做聖誕老人呀！」咁靚仔的聖誕老人大家可能未見過，但Albert笑到幸福滿瀉的樣子卻是每個父親的最佳寫照。「有小朋友後的聖誕是不同的，以前同另一半會互相期待對方有甚麼驚喜畀自己，但現在我們兩個都要負責製造驚喜。 」至於六號同Michael，兩位的佳節可說是天南地北咁過，皆因虔誠教徒六號會返教會參與子夜彌撒，而Michael就會留守崗位主持熱鬧的倒數活動。「冇女朋友嘛，好在有工作陪我歡度佳節。 」Michael大方自嘲。

拆解「酗酒之謎」

桌上大餐飄香，有來自芬蘭的燒鹿肉配紅酒金巴侖汁、來自冰島之可持續發展的胡椒煙薰比目魚、瑞典焗肉丸配牛肝菌忌廉汁，以至納維亞純朱古力蛋糕及丹麥菠蘿酥條等，一如人生五味俱全。趁著年尾，順勢問下三位怎樣總結今年。Albert說湊仔有時「好哽」，加上剛巧愁緊囝囝選校事宜，故生活甜中有辣；六號有份主持的飲食節目愈做愈有，和女友又到了談婚論嫁階段，是為甜中更甜；又做主持又拍戲的Michael忙足成年，總結道：「好開心今年多了機會接觸不同類型的工作，但辛勞工作的背後有時頗為辛酸，所以我係甜中有酸。 」

有人曰戀愛滋味既酸且甜，不知這是否一種戀愛預感？趁著Michael咁感慨，Albert和六號便乘機大爆他的小怪癖。「佢好鍾意同嘉賓飲著酒做節目，醉住都做到節目，總之一定要有酒！」「我講呢個仲怪，同佢去打邊爐，人人食海鮮食肉，佢嗌了一碗……白飯！」說罷三人笑成一團，難得Michael也不介意「做靶」，在前後夾攻中仍不忘解畫。「其實也不一定要有酒才做到節目，但你明啦，酒後吐真言嘛，完全是為了節目效果著想！」

百尺竿頭　更進一步

藝人基本上要全天候面對鏡頭，三位有豐富的娛樂主持經驗，自然最明白箇中辛酸。藝人一般都需要顧及身型不能放肆，不像普通人可靠美食緩解壓力，但被譽為「食極唔肥」的六號卻坦言：「我好鍾意食，加上跟著阿媽點會冇口福，其實我都肥，不過你們看不到而已。 」談到壓力，兩子之父Albert笑說：「找些更難更辛苦的事做囉。哈哈，其實我很享受工作，並不覺得辛苦，對我來說比較大壓力的，應該是為兩個仔籌謀將來，光是選校已經咁大工程，為人父母甚艱難呀。 」開啟了「傻爸爸」模式的Albert正準備大談「湊仔經」，就被另外兩人取笑其藝人身份是兼職，六號和Michael代為澄清：「佢正職係做爸爸，所以平日的藝人工作已是減緊壓！」

「又好似係喎，例如現在做訪問，其實就是我的蛇王時間。 」Albert幽默回應。至於三人中最貪玩的Michael亦樂於分享他的減壓良方 ── 電單車。「我喜歡揸電單車，風馳電掣之後就冇晒壓力，當你好集中眼前條路、全心全意揸完程車後落地，哇！成個人鬆晒。平日揸車返放工就是我減壓的最好方法。 」

生活是漫漫長路，風吹散了困倦，人養足精神後便朝目標再出發。《娛樂3兄弟》收視口碑俱佳，問到明年最想找誰上節目，六號選了同屬教徒的Sammi；Michael追求火花，選了敢作敢言的好友鄭中基；Albert則認為不妨Dream bigger，選了國際巨星湯告魯斯，「把目標訂高一點，先有機會衝出國際。 」

雖然工作愈來愈忙，但他們三人都一致認為最緊要珍惜家人，也很享受把歡樂帶給身邊親朋好友。香港人出晒名搏殺，但聖誕一年只有一次，各位何不放下手頭工作，約家人朋友食個豐盛大餐好好慶祝？